Huntingtower

no video

Lyrics

Jeanie
When ye gang awa, Jamie
Far across the sea, laddie,
When ye gang to Germanie,
What will ye send to me, laddie?

Jamie
I’ll send ye a braw new gown, Jeanie,
The brawest in all the town, lassie,
And it shall be o’ silk and gowd,
Wi’ Valenciennes set round, lassie.

Jeanie
That’s nae gift ava, Jamie,
Silk and gowd and a’, laddie,
There’s ne’er a gown in a’ the land,
I’d like when ye’re awa, laddie.

Jamie
When I come back again, Jeanie,
Frae a foreign land, lassie,
I’ll bring wi’ me a gallant gay,
To be your ain gude man, lassie.

Jeanie
Be my gudeman yoursel’, Jamie,
Marry me yoursel’, laddie,
And tak’ me ower to Germanie,
Wi’ you at hame to dwell, laddie.

Jamie
I dinna ken how that wad do, Jeanie,
I dinna see how that can be, lassie,
For I’ve a wife and bairnies three,
And I’m no’ sure how ye’d agree, lassie.

Jeanie
Ye should hae telt me that in time, Jamie,
Telt me that lang syne, laddie,
For had I kent o’ your fause heart,
Ye ne’er had gotten mine, laddie.

Jamie
Your een were like a spell, Jeanie,
Mair sweet than I could tell, lassie,
That ilka day betwitch’d me sae,
I couldna help mysel’, lassie.

Jeanie
Gae back to your wife and hame, Jamie,
Gae back to your bairnies three, laddie,
And I will pray they ne’er may thole
A broken heart like me, laddie.

Jamie
Dry that tearfu’ e’e, Jeanie,
Grieve nae mair for me, lassie,
I’ve neither wife nor bairnies three,
And I’ll wed none but thee, lassie.

Jeanie
Think weel, for fear ye rue, Jamie,
You’ll no get ane mair true, laddie;
For I have neither gowd nor lands,
To be a match for you, laddie.

Jamie
Blair in Athol’s mine, Jeanie,
Fair Dunkeld is mine, lassie,
St. Johnstoun’s bower, and Huntingtower,
And a’ that’s mine is thine lassie.

More information

More nursery rhymes lyrics with H